মুখ্য পৃষ্ঠা
06/04/25
15:18
• অজ্ঞাত ঠিকনা •
ফাগুনৰ শুকান পাত বোৰ গচকি গচকি
তেওঁৰ হৃদয় চহৰলৈ বসন্ত হৈ আহিছো
চ'তৰ দিঘলীয়া দিনৰ পৰিসমাপ্তিত
ৰাতিলৈ হৈছো বৰদৈচিলা
তেওঁ হয়তো অনুভৱ কৰে ,
ভালপোৱাৰ পৌৰাণিক সংবিধান উলংঘা কৰি
মই আইন অমান্য আন্দোলনেৰে
ভালপোৱাৰ সংবিধান ফালি চিৰাচিৰ কৰো |
এই যে বসন্তৰ কপৌ ফুলি পাহি তেওঁৰ পদূলিত ফুলিছে
আনে নজনাকৈ তাৰ সুগন্ধ
মোৰ বুকুলৈ আহিছে
তেওঁ সেয়াও জানে |
যিপাহ ফুল তেওঁৰ খোপাত ফুলিব
সেই পাহেই যে মোক আমনি কৰে তেওঁ নুবুজে |
বুজিবলৈ তেওঁ ভালপোৱাৰ সংবিধান নপঢ়ে
আৰু বাৰেৰহণীয়া কিতাপৰ বুকুয়ে বুকুয়ে
ভালপোৱাৰ সংজ্ঞা বিচাৰে |
তেওঁৰ বাবে মই এটি কবিতা
অথবা বসন্তৰ এচাটি মলয়া |
মই পৰাধীন ,অথচ তেওঁ স্বাধীন
তেওঁ জোনাকৰ বৰষুণ ভাল পাই বাবেই
এন্ধাৰত সপোনৰ কবিতা লিখে
আৰু মই ব্যতিক্ৰমি হওঁ বাবেই
তেওঁ ফাগুনৰ সৰাপাত গচকি গচকি
মোক অপমান কৰে |
তেওঁ জেতুকা ভাল পাই
আৰু মই তেওঁৰ দুহাত
তেওঁ ভাল পাই সেউজীয়া ৰং
আৰু মই হওঁ বসন্তৰ সেউজীয়া আঁচল |
প্ৰাৰ্থক্য একেটাই...
তেওঁ সেউজীয়া পি পি বসন্ত হয়
আৰু মই বসন্তৰ ঠিকনা চিঠিত লিখি
শীতৰ কোলাত তেওঁৰ আলহী হওঁ |
মই ভালপাওঁ মোৰ অতীত জীৱনক
তেওঁ ভাল পাই মোৰ দুখক ,
বিদ্ৰুপৰ হাঁহি ওঁঠত লৈ
মোক কৰে লজ্জিত ,
মই দুখৰ পোচাক পিন্ধি
সদ্যস্নাতা গাভৰু জনী হৈ দুখ বোৰ সাৱতি ধৰো ।
বসন্তৰ হাবিয়লি বাট কাটি
তেওঁলৈ সংগোপনে অপেক্ষা কৰো ।
( সময় , তেওঁৰ গুপন ঠিকনা মোক নুসুধিবা )
অপমানৰ কঠিয়া বৰ্তমানত সিঁচি
অতীতলৈ উলটি যাওঁ ।
তেওঁ নুবুজে ,
মোৰো যে হৃদয় এখনি আছে
যি নীলাম হৈছে কাৰোবাৰ কপালৰ সেন্দুৰতে ।
____ৰাজু কলিতা
04/03/15
